Search

الكوتشنج (١)



السلام عليكم ورحمة الله. اعرفكم بنفسي انا هديل الحكيم مدربة تغيير حياة transformative life coach ومدربة تنمية بشرية. حابدا معاكم سلسلة مقالات عن الكوتشنج لانه لقيت كتير من الناس ما فاهمينه وخالطينه بالتدريب.


طيب يعني شنو كوتشنج coaching؟ في تعريفات كتيرة ومختلفة للكوتشنج ولو عملنا بحث للكلمة نفسها في قوقل ايييك حنلقي معاني كتيرة جدا. الكوتشنج ممكن يكون هو السبب البشجعك انك تجربي شي جديد كسلوك او عادة، او انك تبدي بزنس بدون تردد، والكوتشنج ممكن يوضح ليك انت عايزة شنو بالضبط وتحددي اهدافك كيف، وممكن يوريك كمان تحسني علاقاتك كيف سواء مع الشريك او غيره. الكوتشنج بيساعدك تلقطي بالضبط انت عايزة شنو، وتنتبهي للما محتاجة ليهو في حياتك شنو، وتتخلصي من اي شي ممكن يكون السبب انك ما قادرة تمشي لقدام.


اتخيلي انك يوم الصباح قررتي انك عايزة تطلعي من البيت. فتحتي الباب ووقفتي، ما عرفتي نفسك عايزة تمشي يمين او شمال ومحتاجة انك تقرري. في الاساس انت قررتي قرارك الاول وحددتي انك عايزة تطلعي لكن ما عارفة تمشي وين، طيب وين الكوتشنج هنا ووين ممكن يكون محله؟ مفهوم الكوتشنج ظهر في العالم قبل ١٥ سنة عشان يساعد الناس يقدروا يوصلوا للمكان ال هم عايزنه بفعالية اكتر وبكفاءة اكبر، بالاضافة انهم يتعلموا طريقة جديدة للحركة والوصول لغايتهم. الكوتشنج حيساعدك تقرري بالضبط لما تكوني مقررة انك طالعة انت ماشة وين. بتعبير تاني: الكوتشنج هو عملية التخيل للهدف ووضوح الرؤية للهدف دا واختيار الطريق الامثل ليهو، يساعدك ترسمي خريطة وتختاري وسيلة النقل المناسبة ليك وخلال رحلتك تتعلمي طريقة جديدة (للسفر).


طيب هل مدرب التنمية البشرية هو نفسه كوتش؟ لا، المدرب بيدربك علي مهارات معينة خلال تقنيات معينة في مجالات معينة. المدرب مؤهل تماما يدربك في اي مجال لانه هو نفسه مؤهل من خلال دورة اعتماده كمدرب (دورة تدريب المدربين TOT) انه يدربك في المجال ال هو متخصص فيه، ممكن مجال اداري او مجال مهارات مهنية او سلوكيات اسرية الخ. للاسف في السودان بيطلق علي المدرب لفظ كوتش لكنه هو مدرب فقط. طيب يا هديل، هل الكوتش مدرب؟ ايوة! الكوتش بيشتغل واحد لواحد one to one من خلال جلسات خاصة عشان يساعدك تفهمي رغبتك الحقيقية هي شنو ويساعدك ترسمي خطتك البتشبهك في الوصول لغايتك. وبنفس المستوي الكوتش ممكن يدرب مجموعة من الناس علي مهارات شخصية وسلوكيات وعادات حياتية محددة تساعدهم يغيروا من استايل حياتهم للافضل، لانه احيانا بنكون بس محتاجين نعرف تكنيك معين يظبط لينا حياتنا. ينفع الكوتش يدرب دورات متخصصة في مجالات ادارية او مهنية او غيره؟ ايوة ينفع اذا اخد TOT ودا الtrending الان، تاخد tot وتاخد certified coaching program لانه الكوتشنج بيخليك تعرفي كيف تتعاملي مع المتدربين عندك بفعالية وكفاءة اكبر.


طيب كيف بنعرف احنا محتاجين جلسات كوتشنج ولا محتاجين دورة محددة؟ تاخدي جلسة مبدئية مع كوتش تناقشي فيها افكارك ورغباتك وعلي اساس مخرجات الجلسة دي حتقدري تقرري هل تواصلي في جلسات الكوتشنج ولا تاخدي دورة بعينها تساعدك في شي معين. اشوفكم في المقال الجاي باذن الله.

147 views4 comments