Search

الكوتشنج (٢)

السلام عليكم ورحمة الله

. المرة الفاتت اتكلمنا عن مفهوم الكوتشنج بشكل عام والفرق بينه وبين التدريب. اليوم نواصل ونتكلم عن العلاقة بين الكوتش والمستفيد من عملية الكوتشنج.


عملية الكوتشنج عبارة عن علاقة مستمرة ومتواصلة بين الكوتش والمستفيد كشركاء في عملية مساعدة ومساندة المستفيد في رحلته لهدفه: المستفيد باختياره لهدفه والكوتشح بمساندته للمستفيد باختيار الطريق الامثل ليهو. الكوتش بيساعد المستفيد باليات ومعينات بتجي في اشكال واحجام واسماء وتطبيقات مختلفة، المهم في الاخر انهم يساعدوا المستفيد ذي ما قلنا يلقي طريقه المناسب عشان يوصل للعايزه ويثبت في طريقه دا ما يطلع منه.

البخلي عملية الكوتشنج شي مميز ومتفرد هي ببساطة طبيعة الكلام او المحادثة بين الكوتش والمستفيد. في معظم العلاقات البروفيشنال، ذي الجهات البتقدم خدمات معينة قصاد مال، بتكون في سلطة في يد الشخص او الجهة المقدمة الخدمة دي. لكن في عملية الكوتشنج بتكون عملية تبادلية وعلاقة متوازية، بمعني انه الكوتش والمستفيد بيقدموا نفس الاجتهاد والزمن والطاقة قصاد تحقيق هدف المستفيد، بنفس مقدار السلطة ليهم الاتنين وبنفس مقدار المجهود. بمعني تاني، الكوتش والمستفيد بيخلقوا سوا محادثة متشاركة، مفتوحة وحقيقية بدون زيف او تكلف او تجمل عشان النتيجة من المحادثة دي تكون ملهمة وتكون حقيقية واصيلة.


عملية الكوتشنج تعتبر عملية ناجحة جدا وناجعة جدا، ولو عملتوا بحث في قوقل حتلقوا دراسات معتمدة في مجلات عالمية معتمدة بتأكد فعالية عملية الكوتشنج، سواء علي الافراد او المؤسسات. كيف يعني مؤسسات؟ المؤسسات الان بقت ماشة في اتجاه انها توظف كوتشز بصفة دايمة وظيفتهم تحسين حياة الموظفين للافضل. المؤسسات الاتخذت القرار دا لقت انه الانتاجية زادت بدون ما يضطروا يدفعوا زيادة او يوظفوا ناس جدد. وفي دول عربية حتي الوزارات فيها وظفوا كوتشز لرفع الاداء منهم الاردن. ليه المؤسسات لجأت للكوتشنج؟ لانه عملية ناجحة في مساعدة الناس علي وضوح المشاكل البتمر البيهم ووضوح الحلول المتاحة ليهم والمناسبة ليهم، وعملية ناجحة لانها بتنبه الواحد اذا طلع من المسار الاختاره لنفسه، وكمان ناجحة لانها بتخليك قادرة تطوري نفسك من خلال امكانياتك ومقدراتك.


طيب كيف نختار كوتش مناسب؟ تختاري كوتش تكون فيه صفات عامة اساسية: اعتماد من جهة عالمية ذي ICF او من جهة محلية ذي الاكاديمية العربية للكوتشنج او جهة تانية حسب البلد الانت فيه، والاهم من كدا يكون كوتش متخصص بشي معين. كيف يا هديل كوتش متخصص؟ الكوتش لازم يكون عنده تخصص واضح: هل متخصص بالمراهقين؟ بانه يوريك كيف تديري الاموال؟ او كيف تختاري العمل المناسب؟ بالعلاقات؟ بالعلاقات الاسرية؟ بتأسيس حياة جديدة للمنفصلات؟ بالتعايش مع صدمات معينة في الحياة؟ الخ ….. ليه؟ لانه الكوتش كل ما كان متخصص بشي محدد كل ما كانت خبرته اعلي في الحاجة الانت محتاجة فيها مساعدة. لما بطنك توجعك ومتاح ليك خيارين: طبيب عام وطبيب باطنية حتختاري منو؟ لما تكوني عايزة محاسب يظبط ليك حسابات البزنس حقك وعندك خيارين: محاسب ميزانيات ومحاسب عام حتختاري منو؟ لما تكوني عايزة تفصلي فستان زفاف وعندك خيارين: خياط زفافات ولا خياط بِدل حتختاري منو؟ يبقي فتشي علي الكوتش الخبرته او خبرتها في نفس الشي المحتاجة تلقي ليهو حل عشان تضمني الخبرة الاكبر والاطول في المجال. اشوفكم في المقال الجاي باذن الله.

23 views0 comments