Search

Brain Dump تفريغ الدماغ

Updated: Aug 24, 2020

السلام عليكم وصباح الخير ومساكم نور العزيزات وين ما كنتوا. بما اننا علي مشارف بدايات جديدة عايزة احكي ليكم عن عادة مفيدة يمكن بعضكم بيعرفها وال هي تفريغ الدماغ او brain dump. ببساطة ال brain dump هو انك تفرغي كل الفي مخك علي الورق عشان تفضيه تماما وتقدري تركزي خصوصا اذا عندك موضوع شاغل بالك ذي شغل زواج سفر مشروع اي حاجة، بالتالي تكون رؤيتك واضحة وافكارك قدامك تقدري ترتبيها ذي ما انت عايزة.

المخ يا جماعة الخير مكان لتوليد الافكار مش للاحتفاظ بيها لاننا كل ما نحتفظ بكل شي في مخنا حنستهلك خلايا ذاكرة اكتر وبالتالي طاقة اكبر. اتخيلوه ذي رامات الكمبيوتر، رام الكمبيوتر ذاكرة مؤقتة مهمتها تحتفظ ليك الان بالشي البتعمليه في اللحظة دي، اذا ما عملتي save ببساطة الكمبيوتر حيتقل وسرعته تتاثر. المخ لو استمريت املاه بحاجات بدون اعمل save وافضيه اول باول في المكان المناسب حيتعب وحادخل في ارهاق ذهني وافقد التركيز وذاكرتي تتشوش. باختصار ما تعملي overload لمخك.

كيف تعملي ال brain dump ؟ عن طريق ٤ خطوات: ١- تجيبي ورقة بيضا فاضية او تفتحي صفحة فاضية في نوتك وتكتبي فيها اي شي في راسك مهما كان، حاجاتك اليومية اهدافك واجباتك قرايتك شغلك مشروعك، اي شي بدون ترتيب او تنظيم. اكتبي لحد ما تحسي انه مخك فضي تماما من اي حاجة. ما تشغلي نفسك انك تكتبي بترتيب لانه الفكرة انك تفرغي كل شي علي الورقة القدامك دون تنسيق. حتلاحظي انه الافكار بدت تجري بسرعة شديدة وتجيك فكرة في نص فكرة ما عندها اي علاقة بالتانية، اكتبي، اكتبيهم كلهم.

٢- الفرز: تعملي في ورقة جديدة ٣ قوائم: الالتزامات، الرغبات، الاحتمالات. تبدي ترتبي الكتبتيه تحت التلاتة قوائم دي بفهم اي شي حتما ولابد يتعمل يبقي التزام، شي عايزة تعمليه يبقي رغبات وشي ممكن ما يتعمل حسة او يمكن تعمليه لقدام يبقي احتمالات. حتلقي في حاجات ما عندها معني اشطبيها.

٣- فندي قوائمك العملتيها لستة انواع في صفحة جديدة: النوع الاول مشاريعك: اي افكار كتبتيها بتخص مشروعك اكتبيها في ملف مشروعك فورا. النوع التاني الاعمال العليك: مفترض انك محددة اهدافك واولوياتك وعارفة كل مرحلة لازم او مفروض تنجزي شنو بالضبط وجاتك الافكار دي وكتبتيها تقومي تختيها هنا. انتبهي حاجة واحدة بس تجاه كل التزام، ما تزحمي نفسك. النوع التالت الاعمال المستقبيلة: حاجات ما حتقدري تاخدي action تجاهها الان لكن ممكن في المستقبل ذي افكار جديدة او مشروع محدد ذي اعادة تنسيق ديكور بيتك مثلا او مقاطع فديو فيها شي مفيد عايزة تجربيه لقدام. النوع الرابع الاجندة: هنا تنزلي اي حاجة عندها زمن وتاريخ محدد مافي اي طريقة ما تنجزيه، يا عملتيه يا راح عليك ذي مواعيد طيارتكم مثلا. النوع الخامس المصادر: رقم حافظاه لجهة معينة حتستفيدي منها ذي رقم ناس الغاز، قائمة احسن مطاعم في البلد تختي فيها اسم مطعم رشحوه ليك، مقال فيهو فكرة كويسة لتحسين جودة دراستك الخ. النوع السادس الحاجات المنتظرة (ما في يدك): ايميل من جهة محددة، ناس الورشة يخلصوا عربيتك، البيبر بتاعتك تتنشر في المجلة الراسلتيها الخ.

٤- نرجع لقوائم الخطة ٢: ارجعي لقوائمك التلاتة عدلي حسب توزيعك للستة انواع شنو يفضل محله وشنو من التزامات يتنقل للرغبات او العكس وشنو حتلغيه خالص.

طيب كدا خلصنا؟ اكيد لا 😁. الغرض شنو اصلا من brain dump، اني استفيد من كل افكاري ومعلوماتي وملاحظاتي، اني عندي حاجة عايزة اعملها وافكاري كتيرة وراسي زحمة من باقي الحاجات. وبالمناسبة الفكرة بتجر الفكرة ذي مثلا لما تقولي عايزة اخسر ٥ كيلو دي فكرة. يبقي محتاجة اعمل رياضة، يبقي مشي ولا جيم وياتو جيم لازم اعمل بحث. واذا مشي اتمشي وين وكيف ومتين. ويبقي كمان دايت، ياتو نوع وبنفع معاي ولا لأ ومحتاجة افحص الغدة والحديد وفتمين دال ومحتاجة اخد ملتي فايتمنز ولو حاشيل حديد اخد بروتين وهكذا. دا يفند شنو؟ (مشروع)، فيهو التزام؟ ايوة كلاسات (اعمال عليك) بمواعيد وزمن محدد (اجندة). ادوني رقم زول بيوفر بروتين (مصادر). منتظرة نتيجة فحص الغدة عشان ابدا صح (حاجات منتظرة ما في يدك). واخدت رقم مدربة خاصة يمكن لقدام احتاج ليها (اعمال مستقبيلة). يبقي تسجيلي في الجيم وفحص الغدة ومواعيد الكلاسات التزامات، شرا البروتين والملتي فيتمنز رغبات، مدربة خاصة احتمالات.

خلصنا؟ برضو لأ 😅. طوالي امسكي قائمة الالتزمات وزعيها علي خطتك الاسبوعية واليومية وبعدها اعملي نفس الشي لقائمة الرغبات. اتمني تكون الفكرة وضحت وتستفيدوا منها. اهلا باي سؤال او استفسار☘️.




#selfacceptance #lifestyle

37 views0 comments