Search

كيف يمكن لقرار صغير ان يغير حياتك

Updated: Jan 12, 2020

صباحكم خير ومساكم نور وين ما كنتوا. عايزة اسالكم سؤال: كل يوم لما تصحوا بتتوقعي يومكم حيكون كيف؟ افكاركم بتكون شنو؟ إذا لاحظتوا حتلقوا كل البيدور في عقلكم ويومكم هو عبارة عن قرارات: حتلبسي شنو، حتمشي وين، حتقابلي منو، حتنجزي شنو من مسؤولياتك وهكذا. حنلقي حياتنا عبارة عن سلسلة قرارات بغض النظر عن انها بسيطة أو كبيرة. قراراتك دايما تأثيرها يا عليك يا علي الحوليك يا عليكم الاتنين، يبقي لازم نكون واعيين اننا نقرر قرارات صحيحة وبتصب في مصلحتنا. طيب المغزي شنو يعني؟ ما كلنا عايشين وعادي بنقرر الحاجات by default! المشكلة كلها في by default دي، ما بنركز انه قراراتنا مهما كانت تأثيرها علي يومنا وعلي حياتنا بيكون كيف. اتعودنا نتعامل مع الحاجات بمبدأ ذي ما تجي تجي ودا غلط لانه التمن عمرك، عمرك البروح منك يوم ورا يوم من غير ما تقرري لنفسك القرار الصح. اتعلمي تقرري صح وبوعي عشان ما يكون مصيرك الفشل، عشان ما تجي بعد ١٠ سنين تعايني لورا وتندمي لانك ما كنت جادة واهملتي قراراتك. اتعاملي مع قراراتك انها بذور، شوفي نفسك حتبذري بذور شنو وحتحصدي شنو سواء كمية الموية الدايرة تشربيها كل يوم أو تغيير اختصاصك أو نوع شغلك. بشكل عام ممكن نقول في ٩ او ١٠ قرارات احتمال كبير تكوني قررتيها بدون وعي حتندمي لقدام عليها:

قرار انك تخلي الناس يقرروا ليك كيف تعيشي حياتك ❌: قرري الان انه حياتك هي حقتك انا وانت المفروض تكوني in control of it. انت التقرري كل امورك والأنسب ليك شنو. ما تدي زول فرصك يكون صانع قراراتك والولي علي افكارك.

قرار انك تكوني في comfort zone❌: قرري انك تتطوري وقرري انك تتقبلي التغيير البحصل ليك وبحصل حوليك وبحصل في الدنيا كلها. بطلي تهتمي براي الناس في اهدافك، بطلي تقارني نفسك بالآخرين، بطلي خوف من الفشل، عيشي حقيقتك وعيشي وسط ناس بشجعوك علي اهدافك وهم ذاتهم عندهم اهداف.

قرار انك تقبلي باقل مما تستحقي❌: اعرفي قدر نفسك وادي نفسك قيمتها وخليك واثقة انك بتستحقي الافضل في الدنيا دي. اتعلمي تقولي لا لاي شي بتحسيه ما بشبهك. قولي انا مميزة وانا بستحق احسن شي.

قرار انك تستسلمي❌: مادام ختيتي هدف قدامك، نهائي ما تخليه. اتذكري الناس النجحت وعبرت هم الاستمروا لخط النهاية. ممكن تحسي انك تعبتي، ممكن تحسي بشك يا ربي هو دا أصلًا صح، اخدي break. ابعدي شوية، عبي بطاريتك وارجعي تاني. المهم ما تستسلمي.

قرار انك ما تجتهدي❌: قصة انه الكمال لله ما ليها اي علاقك انك ما تبذلي مجهود تجاه امورك الحياتية. بطلي تكوني average. خلي عندك احساس بالمسؤولية تجاه قرايتك، بيتك، شغلك، زواجك، أولادك، هوايتك. ابذلي مجهود عشان تلقي النتيجة البتستحقيها.

قرار انك تكوني كسلانة❌: اتذكري انك موجودة في الحياة عشان عندك دور ورسالة، ما عشان تضيعي زمنك منتظرة الحاجات تجيك لحد عندك. عندك أحلام، خططي واشتغلي عليها بس ما تقعدي منتظرة الفرصة تجيك لحد عندك لانها ما حتجي بدون سعي.

قرار انك تقلقي بخصوص اي شئ❌: القلق عمره ما بيحل شي، الجملة دي اخدت مني زمن طوييييييييل عشان استوعبها صح وندمت علي كل دقيقة ضيعتها في قلق غير الهم والمرض ما جاب لي شي. شاوري ناسك، اتذكري مواقف اصعب مرت عليك واتجاوزتيها وادعي ربنا ينور بصيرتك وانت موقنة بالاستجابة.

قرار انك ما تقضي زمن كافي مع الناس البتحبيهم❌: خليك دايما في تواصل مع افراد اسرتك وصديقاتك، ديل support team حقك، حسسيهم قدر شنو هم مهمين في حياتك واديهم من طاقتك وزمنك وحبك.

قرار انك تشيلي في قلبك❌: اتعلمي احسن من المواجهة مافي. اي زول مزعلك كلميه واجهيه ناقشيه وارتاحي. مهما كانت ردود افعالهم فرغي الفي قلبك وسامحيهم واتجاوزيهم واتذكري المسامحة لنفسك ما ليهم. هم عايشين حياتهم وانت قلبك بيغلي ليه؟

قرار انك ما تسعي ورا شغفك❌: فتشي ورا الشي البتحبيه، اسعي وراه بكل مقداراتك وامكانياتك واستشيري الناس الخبرة. ما تقيفي لحد ما توصلي.

في النهاية، ‏الحياة أقصر من أن نقضيها في علاقات خطأ وفي جو سلبي وفي التخلي عن أحلامنا وإننا نشك في امكانياتنا وفي الخوف من انه نكون نفسنا الحقيقية. ‏ما في حاجة اسمها الكمال، في حاجة اسمها اجتهاد؛ ما في حاجة اسمها رأي الناس، في حاجة اسمها رايي أنا شنو؛ ما في حاجة اسمها اضغط نفسي عشان الناس ينبسطوا، في حاجة اسمها سلامي أنا الداخلي☘️.




#lifestyle #decisionmaking

8 views0 comments